SMART Technology Solutions

الجهاز سهّل علي كثير في الشغل والحياة اليومية. صرت ما أحتاج أشيل معي كتب أو دفاتر وين ما أروح وصار اقل تشتت في استخدام السوشال ميديا! الجودة ممتازة، لكن اللي فعلاً شدني هو تعامل خدمة العملاء. رحت لمكتبهم بنفسي عشان أشوف الجهاز، ومن أول لحظة حسيت إنه هو الخيار الصح. كانوا مرة محترمين ووقفوا معاي خطوة بخطوة عشان أختار الموديل اللي يناسبني. صحيح إني بحثت عن الجهاز قبل الشراء، بس فعلاً نصايحهم كانت واضحة وصريحة. حتى لما الجهاز كان غير متوفر، تواصلوا معي أول ما توفر من جديد وحريصين ما احتجت أتابعهم. الله يوفقكم ويزيدكم من فضله. 🌹

اشتريت جهاز boox go7 حبر اسود بعد استخدام الكندل لسنوات
صراحة كنت متخوفه بس انصدمت بالفرق !! Go7 افضل بكثيير في سرعة استخدام الشاشه وهذي النقطه كانت تضايقني كثير في كندل لانه بطئ (طلع الكندل كانه جهاز بدائي عنده )
الحجم اكبر شوي (انا اخذت7انش)بس الوزن مقارب وهذا الشي مهم لاني اخذه معي كل مكان
كنت اعاني في الكندل عدم توفر كتب عربيه كثيره فكنت احيانا احمل كتب pdf وارسلها لايميل الكندل بس غالبا ماتكون واضحه او الصفحة تكون متحركة
في هذا الجهاز اقدر احمل من تطبيق ابجد مثلا وبسعر اشتراك رمزي وبسهوله. مجرد ماسجلت ايميلي في الجهاز ربطني على طول بحسابي في ابجد على جوالي ، صراحة شي رائع
وفيه تطبيقات ثانيه للقراءة بس ماجربتها
ولاحظت وجود يوتيوب واشياء ثانيه بس ماتهني لاني ابي الجهاز للقراءة فقط
بالاضافه الى ان وجود قلم حقق حلمي. كنت اتمنى القى مذكره معي في كل مكان لاني احب الكتابة كثير : افكار،ملاحظات،تأملات واستصعب اخذ دفتر معاي كل مكان مو لانه اثقل بس لاني ابي احافظ على خصوصيتي 😅وودي اجمع كتاباتي في مكان واحد
وفيه نقطه مهمه عجبتني يمكن تكون سخيفة بس انا تهمني ان الشاحن type c يعني يصير مع باقي اجهزتي ماضطر استخدم شاحن مختلف
السعر اغلى من كندل بكثير وهذا خلاني اتردد صراحة بس على المدى الطويل بوفر لاني في كندل بضظر اشتري من امازون كتاب واحد (والخياراتالعربيه قليله جدا) بمبلغ ٢٥ ريال على الاقل بينما اقدر احمل هنا اكثر بكثير وباشتراك مثلا ٢٥ ريال شهريا وسمعت ان فيه اشياء مجانيه بس ماجربت
وعلى فكرة لما سمعت عنه فكرت اشتري من المواقع الصينيه بس اكتشفت ان السعر مقارب
سعيدة جدا بالجهاز وممتنة لسرعة التوصيل والاهتمام بالعميل والخدمة الرائعة
للامانه اول مره اكتب مراجعة عن شي وبهذا الطول😂 مصدومة من نفسي 😂اتمنى ان تكون مفيده لاني كنت محتارة في نقاط معينه ويمكن تهم احد غيري